LITURGI DOHOT PODA PARAGENDAON

Ket. Gambar: Pelayanan Minggu di BNKP Depok

LITURGI DOHOT PODA PARAGENDAON

SINTUHU NI LITURGI

Ia liturgi i i ma ulaon ni Jesus na patupa haluaon ni jolma marhite hamamate dohot haheheonNa. Jadi Jesus sandiri do na patupa liturgi i (=Ibana do Liturgos), ai Ibana do Malim na bolon i. jadi masa do liturgi i sahat di ombas on di surgo, pinatupa Jesus.

Parsidohot do hita di liturgi na disurgo i marhite sakramen (1) Pandidion Nabadia dohot (2) Parpanganon Nabadia nang marhite parmingguonta pe. Ai taboto, naung mate do hita raphon Kristus i jala tahirim na paheheonNa do hita marhite hahehon ni Kristus i (Rom 6:35). Rap tartanom do hita dohot Kristus di na tardidi hita, jala raphon Ibana do hita dipahehe du tingkina (Kol 2:12).

Hombar tusi laos parsidohot do hita di Parmanganon Nabadia, songon parningotan di Ibana. Ia ‘parningotan’ di son, ndada holan parningotan marhite pingkiran sambing marningot tingki na salpu, alai parningotan paboa na raphon Tuhan i sandiri do ngolunta nang huriaNa sahat tu ombas on nang tu tingki na naeng ro.

Ia liturgi na di surgo i marhataridaan ma i marhite liturgi na tapatupa di ngolu parhuriaonta. Tapatupa ma i marhite tolu liturgi : 

Liturgi Tahun

Ia na nidok ‘tahun liturgi’ i ma na marpardomuan tu taon parhuriaon. Nunga nian tangkas i digoari di Almanak ni huria, alai tardok hurang dope penghayatan ni angka deba huria mangihuthon tahun liturgi i. sada na mansai nalnal i ma angka perayaan natal di naso tingkina dope. Ai nunga torop huria mambahen pesta natal di tingki Advent dope. Angkup ni i hurang do perhatian tu paskah dohot perayaan andorang so paskah.

Mansai une ma nian molo sai pinaumbuk sude tahun liturgi angka ulaon huria, asa diurupi i hita paihutihut pardalanan ni Tuhanta. Nunga tangkas i diparungkilhon huria na parjolo i na tau siihuthononta di parhuriaonta nuaeng on.

Liturgi Harian

Di mula ni hakristenon di tano Batak, hira dihasomalhon do partangiangan si lima hali sadari. Di deba inganan manang huria dihatiha i mangkuling do giring-giring lima hali sadari, i ma di pukul 6,9,12,3, dohot 6 botari. Ganup mangkuling giring-giring i sude ma halak Kristen martangiang manang na di dia pe ibana, manang tongon mardalan, mangula dohot na asing. Mangulon be ma satongkin sian ulaonna laho martangiang manang laos jongjong boti satongkin huhut marningot Tuhan i jala martangiang di bagasan rohana be.

Di laon-laon ni ari moru ma i gabe partangiangan sitolu hali sadari, i ma manongot, arian dohot borngin. Torop do ripe na mangulahonsa di hatiha i, na ummotikna simanongot dohot sibotari rampak martangiang dohot manjaha hata ni Debata. Marende be angka keluarga sibotari di bagasna be. Alai hira so tarbege be i di tingki na parpudi on. Tutu sai adong dope na patupahonsa, alai ndang sadia torop be i martimbanghon torop ni ripe ni halak Kristen.

Di liturgi harian on do tangkas pabagason jala rimangan na marpardomuan tu liturgi Minggu. Molo tapamanat Almanak i, hira dipahombar do angka ayat sijahaon manogot dohot botari i tu goar ni Minggu naung salpu, asa sai tongtong dalanan ngolu i di bagasan ‘liturgi’ manang ngolu parsihohoton tu Tuhan i.

Liturgi Minggu

Mansai tangkas ma i idaonta marhite Almanak na pinangke ni huria. Adong be do perhatian Khusus manang ondolan ni minggu. Songon na ginoaran nangkin, Advent ma jolo binahen songon sada tudos-tudos, na adong ondolan secara khusus di ganup Minggu Advent i, mamungka sian Advent parjolo tolhas tu na paopathon. Tarsongon ma ondolan ni ganup Advent i :

Advent I

Hororo ni Tuhan i di ari parpudi (torushonon ma tema manang ondolan on mamungka sian ari Senen tolhas tu ari Sabtu di na saminggu i)

Advent II

Hamubaon ni roha laho manomu Tuhan i (torushonon ma merenungkan on siang ari Senen tu Sabtu).

Advent III

Sipalua do Tuhan na naeng ro i. (torushonon ma tema on sian ari Senen tu ari sabtu).

Advent IV

Olop-olop manang las ni roha na balga manumu Tuhan i. (Sahat tu parpunguan bodari di tanggal 24 Desember).

PANGARADEON NI PARAGENDA

Maragenda  i ma sada ulaon na tangkas  sihobasan ni sintua. Maragenda boi antusanta molo naung tangkas taboto lapatan ni liturgi. Liturgi sian hata Gorik, Liturgos= Ulaon. Ulaon na ni dok na dison i ma ulaon hamalimon, ulaon kultus/ibadat, ulaon na sakral. Jadi secara bulus dilapati liturgi, i ma parture manang ruhut-ruhut ni parpunguan ni halak kristen. Liturgi i ma ulaon ni Jesus na patupa haluaon ni jolma marhite hamamate dohot haheheonNa. Jadi Jesus sandiri do anggo liturgi i. ai Ibana do malim na bolon i. Sian i do tubu ulaon maragenda.

Maragenda ima manguluhon ulaon na kultus. Hajongjongan ni sahalak paragenda songon uluan ni saluhut ulaon i. parenda manang digoari Liturgis bertindak selaku uluan ni angka ruas na laho pajumpang dohot Debata. Jadi paragenda i gabe parhitean ni ruas dohot parhitean ni Debata di ulaon i. Na padop-adop do hita dohot Debata di angka ibadahnta di huria i, di na padop-adop hita lehonon ni Tuhanta ma di hita patik, hasesaan ni dosa, patolhashon hataNa, dohot paspasuNa.

Molo so sala hita mamereng, hira so apala hea do paragenda paradehon diri dohot paradehon Agenda andorang so maragenda di parmingguon manang angka pesta parningotan di huria. Somalna sungkup do ro parengenda tu gareja, dung i ‘dihobasi’ ma disi marhite na mameakhon tanda ni Agenda i, huhut manghata-hatai dohot dongan parhalado. Laos adong do na paradehonsa huhup marisap. Dihilala roha siparungkilhonon do on.

Didok roha, songon pangaradeon di jamita, suang songon i tung mansai ringkot do paradeon diri laho maragenda. Ai ndang holan na manjaha boti hita di na maragenda. Manontuhon situtu do peranan ni paragenda laho mangurupi parminggu marsaulihon sintuhu ni parmingguon i.

Na boi do pangunjunan manonggopi paragenda naung somal dohot na so somal maragenda. Paragenda naung somal maragenda boi tarunjun manghilala na so pola ringkot be pangaradeon. Olo ro tu pingkiran, ‘ah, aha pola maol ni i, nunga somal iba maragenda’, ninna rupani. Tutu adong do pandohan ni halak Batak na mandok somalna do peamna. Alai laos jotjot masa do ‘peamna do magona!’ Sipata nomor alaman ni agenda i pe nunga diapil deba parhalado. Nauli ma i tutu, alai ndada holan marpartalian tu lancarna manjaha Agenda paragendahon i. ai na boi do tingkos sude jinaha Agenda i, ndang pola mago pusuk, rupani, alai hira so adong penghayatan, ndang manorusi tu roha parbagasan i. tamba ma i muse molo songon na dipabongor-bongor manang dipasing-asing soarana. Jadi boi do lancar manjaha, alai hurang manogu tu penghayatan ni ibadah i.

Sabalikna, angka na somal dope maragenda adong ma i na manghutur lututna (santabi) dohot tanganna. Humutur gariada dohot Agenda i. Gabe apala sude tartuju rohana dohot pingkiranna pabalik-balik alaman ni Agenda i boha ma asa unang sala manang unang mago pusuk. Gabe gumodang panghilalaan ni paragenda i mangadopi Agenda i. ala ni i, na tarjadi i ma “manjaha votum, ndada na mangoku paboa na ditonga-tonganta Tuhan i, manjaha tangiang ndada na martangiang, manjaha Bibel, ndada na patubegehon hata ni Debata, pajojorhon haporseaon na niapil, ndada na manghatindanghon haporseaon.

Hape, ia apala na rumingkot i ma na padop-adop do hita di parmingguon manang ibadah i dohot Tuhanta nang huriaNa pe. Naeng ma paragendahon i manogu roha tu haporseaon dohot panghilalaan na raphon Tuhanta hita, na Ibana do mangalehon patik, hasesaan ni dosa, patolhason hataNa, pasu-pasuNa, laos Ibana na paborhat sude ruasNa mamaritahon Barita Nauli i.

Ala ni i, saulak nari, mansai ringkot ma mangarade paragenda sian bagasna be: pangaradehon diri nang pangaradehon di na manjaha Agenda i di jabu, nang pe Nung somal jala peam mambungkasa. Jahaon jala pinartondihon ma nang turpuk epistel di jabu asa unang sala manjaha jala gabe partuktuhan tu na manangihonsa. Asa marhite pangaradehon diri na songon i, gabe jumpang parminguguon na mangolu sipanogu tu parsihohoton di Tuhanta.

Angkup ni i naeng ma sauduran hita dohot panurirang Jeremia na manghatindanghon: “dung jumpang ahu hataMu, gabe husolsoli do i, jala hataMu do las ni rohangku.... (Jeremia 15:16). Ai imbaru jala rata do asi ni roha ni Debata ganup manogot (Partudos tu Andung 3:22)

Sipasidingon do na mangido pangurupion sian alkohol ni anggur manang tuak na pang asa barani jongjong. Tung sian Tuhan i ma pinangido pangurupion marhite panghobasion na tangkas mardongan tangiang andorang so maragenda. Sian Debata do mual ni ‘sahala’ manang wibawa na manghorhon pasupasu. NN